Alfons Tuor: Il vitg natal
In cant en ti‘ honur entscheivel,
Miu vitg natal.
Ti eis il vitg il pli plascheivel
De tut la val.
Co schais sin spunda sulegliva
Bein da smarvegl!
Gl‘ unviern ê baul tier tei arriva
Il car sulegl.
Atras tei legramein semeina
In rein carin.
Sper el da di e notg scadeina
Enqual mulin.
Pumera bracc‘ ed aulta crescha
En tiu contuorn,
Cun finas pumas emplenescha
Plantiu e fuorn.
O vitg sin la pli biala spunda
De tut la val,
Tei sai jeu mai ludar avunda,
Miu vitg natal.
Jeu sentel mo in desideri
Ad in sentir:
Dieus laschi mei en tiu santeri
Ruassar, durmir!
Alfons Tuor (1871-1904)
Stupenta poesia dil grond poet da Rabius ch'ei morts bia memia baul. 
Tgisa sco el formulass oz, suenter ch'ins ha baghegiau da tuttas sorts casas da betun ed in'autobann atras "il vitg natal".
Stupenta poesia d'in grond poet romontsch. 
Tgisa sco sgr Tuor formulass oz, suenter ch'ins ha baghegiau da tuttas sorts casas da betun ed in autobann atras "il vitg natal".