Sogn Marc, evangelist.
pdf: cheu l’entira historia
Ils 25 d’avrel: Sogn Marc, evangelist
Sogn Marc vegn aunc oz veneraus en las pleivs e tenius per patrun encunter tuttas malauras e tempiastas. Il sogn evangelist fuva in Hebrè e carteivlamein in dils 72 giuvnals che Cristus veva tschentau per cumpogns e discipels da sogn Pieder. Cura che sogn Pieder ha bandunau Ruma, han ils fideivels rugau Marc da metter a scret tut quella ductrina dada ad els sur dalla veta, passiun e mort da Jesus Cristus. Entuorn igl onn 49 ha sogn Pieder lu tarmess siu giuvnal Marc ell’Egipta. El retscheiva la benedicziun, pren cun el il sogn evangeli ch’el veva scret e semetta sin via tras pliras tiaras cun converter grond pievel tier Cristus. Suenter entgins onns arriva sogn Marc ad Alexandria en Egipta. Cun siu viver exemplaric, cun ses priedis, sias ductrinas e miraclas ha il sogn evangelist convertiu ton pievel ch’el ha lu baghegiau si leu ina baselgia en honur da sogn Pieder che viveva aunc. Papa Gelasi ha declarau quella per emprema e principala baselgia patriarcala dall’Egipta. Per puder retscheiver ed instruir tut il pievel convertiu, ha el silsuenter construiu pliras baselgias parochialas ed ordinau buns spirituals per administrar quellas. Ils convertits eran schi envidai dil fiug dalla carezia divina che zun biars bandunavan per amur da Diu casa e cuort e mavan sco eremits ora el desiert. Denter els flureva vera humilitonza, fraternitad, pasch e concordia. Pertgei els vivevan ina cuminonza, sco ins anfla aunc oz en las claustras. La ductrina e la veta da sogn Marc muentava aschia biars da passar per la via stretga e segira dil parvis. Vesend ils tschocs e stinai pagauns che lur tempels vegnevan pli e pli vits, han els encuretg da far murir quei sogn apiestel. Per buca schar las nuorsas senza pastur, nominescha il sogn Anianus per siu succesur ad Alexandria cun aunc benedir ora augsegners e diacons per las pleivs. El denton ei seretratgs a Pentapolis, nua ch’el veva gia fundau la baselgia catolica. Suenter dus onns da pastoraziun viseta el puspei Alexandria ed ei tut consolaus ch’il diember dils catolics era carschius taluisa. Ils pagauns che audan da siu retuorn han immediat concludiu da realisar lur plan fatgs avon dus onns. Pia ils 24 d’avrel, gest da quellas uras ch’il sogn celebrava la sontga messa, ein ils ravgia pagauns sederschi en baselgia. Ligiaus vid ils mauns e cun ina suga entuorn culiez runan els il sogn ord baselgia e cun gronda groppadad e canera per las gassas dil marcau entuorn. Sogn Marc engrazia a Diu per la grazia da saver endirar per amur dalla giustia. Sur notg han ils pagauns serrau sogn Marc en ina tschuffa perschun. Entuorn mesanotg cumpara in aunghel e di: O Marc, survient da Diu, tiu num ei screts el cudisch dalla veta: ti eis dumbraus denter ils apostels e tia memoria ha da cuzzar en perpeten: tia olma vegn prida dils aunghels si en tschiel e tiu tgierp vegn honoraus sin tiara. Tut consolaus roga ed engrazia il sogn marter da puder ventireivlamein vegnir tier siu Scaffider. Diu cumpara lu ad el en persuna cul salid; Marc, miu evangelist, la pasch seigi cun tei! E sin quei ha il sogn rispundiu: La pasch eis Ti, miu Segner Jesus Cristus. L’autra damaun runan els il sogn tras vias e gassas sco il di avon, entochen ch’el ei staus morts. Ei fuva ils 25 d’avrel digl onn 68. Per cuntentar lur ravgia vevan Ils sbiers, semtgau in grond fiug per metter il sogn tgierp en tschendra. Mo sinquei ha Diu leventau ina sgarscheivla tempiasta ch’ils pagauns han stuiu fugir e surschar il tgierp als cristians per saver satrar. En quei liug ei vegniu baghegiau ina baselgia en sia honur. Entuorn 800 onns ein quellas reliquias stadas veneradas leu en in sarcofag da marmel avon igl altar grond. Lura han ils Venezians retschiert quellas reliquias e tschentau ellas en la maiestusa basilica San Marco amiez Veniescha. Quei grond sogn evangelist vegn leu honoraus treis ga ad onn cun gronda festivitad per patrun dil marcau, schurmegiader dalla provinzia Veneto e sco patrun baselgia.